تجربتي في المسار الصحي، جامعة الدمام.

ماذا بعد التخرج؟

التخرج من المرحلة الثانوية لا يعني إنتهاء الدراسه, برأيي الدراسة الحقيقية وبداية تحديد المستقبل عند التخرج من المرحلة الثانوية والإنتقال إلى المرحلة الجامعية.

-        إختيار التخصص

بالنسبة لي, كنت مشوشه ولحد إجازة ثالث ثانوي ما كنت عارفه وش التخصص اللي بدرسه!

نسبتي كانت تؤهلني لأي تخصص وبأي جامعة, وهالشيء زاد حيرتي.

-        لماذا إخترت المسار الصحي في جامعة الدمام؟

أهلي كانوا يشوفوني دكتورة! وكنت أفكر بدراسة تخصص صحي لذلك في ترتيب الرغبات إخترت الطب/المسار الصحي. ما كنت واثقه من قراري, لذلك بدلاً من دراسة "تحضيري طب" إخترت المسار الصحي في جامعة الدمام لأن المسار الصحي يندرج تحته أكثر من تخصص وبعدين أقدر اختار منها, ولكن بعد ما تعرفت على التخصصات الصحية وبعد ما تعرفت على طبيعة المواد,عرفت ان الطب هو التخصص اللي يناسبني واللي شفت نفسي فيه.

-        بعد القبول

·         بتوصلكم رسالة بالقبول, لإستكمال إجراءات القبول لازم تسووا فحص طبي أو ما يُعرف بـ "إختبار اللياقة المهنية" وبيتم تحديد موعد ومكان الفحص عن طريق رسالة نصية. في الفحص بياخذوا منكم عينة دم وبيسووا لكم فحص نظر وبيسألوكم إذا كنتوا تعانوا من أمراض او لا.

·         قبل الدراسة بأسبوع تقريباً بيكون عندكم "إختبار تحديد مستوى" لـ اللغة الإنجليزية.

الإختبار كان –إختيار من متعدد,MCQS- مشابه لإختبارات قياس وبناءً على نتيجة هذا الإختبار بيتم تقسيمكم إلى مستويات، ونتيجته لا تؤثر على معدلكم أو درجاتكم, وما فيه أفضليه لمستوى على المستوى الآخر.

الغرض من الإختبار هو تقسيمكم على حسب مستوياتكم لتطوير لغتكم بالشكل الصحيح.

المستويات :

- متقدم Advanced : يدرسوا Book 4 + 5

- متوسط Intermediate : يدرسوا Book 3 + 4 وشوي من 5

- مبتدئ  : Beginner يدرسوا Book 2 + 3 + 4

وفيه إختبار Speaking مُلحق بهذا الإختبار, وبالنسبة لدفعتنا كان الإختبار بعد ظهُور نتائج الإختبار الورقي لذلك ما كان مُؤثر.

الأسبوع الأول : داومنا يوم واحد وهو "يوم التهيئة" كان يوم تعريفي عرفونا على الأنظمة، اللبس.. وأعطونا منشورات ودليل إرشادي فيه خطوات تسجيل المواد وتعليمات مُهمه. وكان فيه بنات من الدفعات السابقة تكلموا عن تجاربهم <3.

المرحلة الجامعية :

المرحلة الجامعية من واقع تجربتي, تُكسب الشخص الصبر, الإعتماد على النفس, تنظيم الوقت, إغتنام الفرص....

اذكر أول دوام رسمي, إختبرنا Speaking الصباح. وبالنسبة لجدولي كان عندي كلاس حاسب من 3 إلى 5!

يعني ظليت من الساعة 10 إلى 3 فاضية أنتظر الكلاس, هذي كانت أول صفعة لما وصلت البيت والشمس غابت. تذكرت هالمقُوله, اللي عشتها فعلياُ :

الدوام الطويل من اكبر التغيرات اللي حسيتها, فعلاُ حسيت بالفرق. كنت ارجع من المدرسة الساعة 11:30 وإذا كانت عندي حصة سابعة أرجع 12. في البداية كان الوضع جداً مُتعب بس بعدين تعودت. 

‘

ببدأ اتكلم عن المواد وطبيعة الدراسة :

المواد تنقسم إلى مواد سنوية ومواد فصلية.

المواد السنوية : دراستها طوال الفصلين الأول والثاني وإختبارها يشمل الفصلين.

المواد الفصلية : دراستها تكون لمدة فصل واحد, وإختبارها يكون بإنتهاء الفصل.

الفصل الدراسي الأول First Semester :

مواد سنوية

-          اللغة الإنجليزية العامة General English Language

-          المواد العلمية ( فيزياء Physics، كيمياء Chemistry، أحياءBiology ) مع المعامل Labs

مواد فصلية

-          مهارات التعلم والبحث Learning and Research Skills

-          مهارات الحاسب الآلي Computer Skills

-          العقيدة والأخلاق Creed and Ethics

الفصل الدراسي الثاني Second Semester :

مواد سنوية

-          اللغة الإنجليزية العامة General English Language

-          المواد العلمية ( فيزياء Physics، كيمياء Chemistry، أحياءBiology ) مع المعامل Labs

مواد فصلية

-          لغة إنجليزية أكاديمية وتخصصية  English of Academic and Specific purpose

-          مهارات الإتصال Communication Skills

-          التربية البدنية والصحية Health & Physical Education

-          النظام الإجتماعي في الإسلام Social System in Islam

ببدأ بالمواد السنوية :

          اللغة الإنجليزية العامة General English Language

(اللي جايب 6 أو اكثر بإختار الآيلتس يقدر يسوي drop للمادة.)

المادة اللي عندها اكبر عدد ساعات وأكثر مادة تلعب بالمعدل, عليها 7 وحدات من المعدل. بما إنها مُهمه جداُ, بتكلم عنها بالتفصيل.

الدرجات مُقسمة إلى :

E-learning : 5%

التعلم الإلكتروني عبارة عن Oxford learn : موقع تحلوا فيه تدريبات متعلقة بالوحدات اللي تاخذوها وتابع لنفس الكتاب اللي تدرسوه.

و Blackboard : تبع موقع الجامعة, عبارة إختبارات قصيرة وبيخلوكم تسجلوا برزنتيشن بصوتكم وتنزلوه.

  : Writing Portfolios5%

لازم يكون عندكم ملف وتحطوا فيه الإيسايز اللي بتكتبوهم.

الحضور : 5%

المُشاركة : 5%

Test 1 ميد تيرم 1: 10%

Test 2  ميد تيرم 2: 10%

Test 3 ميد تيرم 3: 10%

Test1 & Test 2 كانوا بالفصل الأول.

Test 3 بالفصل الثاني.

Final Exam  الإختبار النهائي : 50%

كل الإختبارات عبارة عن إختيار من متعدد MCQS, مقسمة إلى  :

Reading: قطعة وعليها أسئلة.

Grammar & Vocabulary: أسئلة على القاعدات والكلمات اللي درستوها في الوحدات.

Listening: إستماع.

Writing: بيحددوا لكم الموضوع ونوع الإيساي اللي بتكتبوه وبيخروكم بين نوعين/موضوعين.

Speaking: إختبار منفصل عادةً يكون بعد الإختبار الورقي. أول إختبارين كنا مجمُوعات تقريباً 5 طالبات. نتناقش وبعدها كل وحدة تجاوب بشكل فردي. الإختبار الثالث والإختبار النهائي كان فردي كل طالبة تدخل القاعة وتجاوب بشكل فردي.

·      أول ميد تيرم كان جداً سهل, وأعلى درجه أخذتها كانت فيه, بينما الإختبار الثاني والثالث كانوا اصعب. نصيحتي : لا تتهاونوا في مذاكرة المادة وذاكروها أول بأول حاولوا تستغلوا أوقات الفراغ او المشوار إلى الجامعة بحفظ الكلمات, هالشيء بيختصر عليكم الوقت.

وعموماً الميد تيرم صعب تنقص فيه لأن تقريباُ كل إجابة عليها 0.1 عشان كذا حاولوا تجمعوا أكبر قدر من الدرجات في الميد تيرم لأن النهائي كان عليه كمية كبيرة من الدرجات 50 درجة وعلى كل سؤال تقريباُ .0.6

لا تتهاونوا بهالمادة ابداً, ووذاكروها مو بس للدرجات عشان تتطور لغتكم بعد.

بتلاحظوا  التطور في لغتكم من بعد شهرين تقريباً وفي كل المهارات كتابة, تحدث, إستماع, قراءة!

 الإختبار النهائي في Book 4  وموحد لكل المستويات.

‘

-          المواد العلمية (فيزياء Physics، كيمياء Chemistry، أحياءBiology )

من أهم المواد وعليها شروط لبعض الكليات مثل الطب وطب الأسنان, بالإضافة إلى الإنقلش والإنقلش التخصصي.

الأحياء Biology

 

بالنسبة لي من أمتع المواد, أجمل مادة! وهي سبب من الأسباب اللي خلتني أختار تخصصي.

من حيث تأثيرها على المعدل, عليها 5 وحدات, وتأثر على المعدل بشكل كبير!

صحيح إنها طويلة ولكن مذاكرتها مُمتعة وجميلة. طريقتي : كنت اذاكرها في الويكند بما إنها طويلة وتحتاج تركيز.

اسئلة القسم دقيقة ولكل سؤال فيه اكثر من اجابة صحيحة, لذلك التركيز اثناء المذاكرة وفهم كُل نقطة شيء مُهم جداً!

اول إختبار كان سهل جداُ, عن الخلية ومكوناتها والنظام الحيوي.

والإختبارات اللي بعدها بدأت صعوبتها تزيد لكن بشكل عام المادة جميلة وسهله وبالنسبه لي أسهل مادة علمية!

الترم الثاني بدأنا نتعمق في المواضيع أخذنا الوراثه واجهزة الجسم, مواضيع الترم الثاني جداُ ممتعه!

بالنسبه لي مذاكرة السلايد ابداُ مو كافيه, الكتاب يوضح المعلومه بالتفصيل وبكذا افهم المعلومه وما أنساها, والرسومات اللي بالكتاب واضحه وحجمها كبير لذا تسهل تثبيت المعلومة.

كتابة الملاحظات والشرح والرسم مع الدكتوره شي مهم جداُ!

الإختبار النهائي حذفوا لنا محاضرتين من الترم الأول, والمحاضرات كانوا 9 صحيح الكمية كبيرة بس اللي يذاكر بتركيز يقدر يجيب a+!. الإختبار النهائي كان سهل ومباشر بس فيه بعض الأسئلة كانت خياراتها متشابهه شوي.

معمل الأحياء Biology Lab

وقت الابات إما 1-3 أو 3-5 على حسب جدول كل شُعبة.

شعبتنا كان من 3-5 بهالوقت ما عندنا طاقه ولكن كنا نحاول نركز, الاب عبارة عن جزء نظري تشرحه الدكتوره والجزء الثاني كان عملي إما يكون سلايدات ونشوفها بالمجهر أو اشياء عملية مثل: قياس الضغط, تجربة فصيلة الدم, وبآخر لاب شرحنا فار. فقرة رسم سلايدات المجهر مُمله, لكن الرسم جداً مهم لفاينل الاب.

كنا متخوفين من الإختبار النهائي وكيف بنذاكر هالكمية الكبيرة. بس بنات من الدفعه سووا لنا مراجعه, المراجعه كانت مرتبه وواضحه وشامله لكل شيء وفعلاً سهلت علينا مذاكرة الاب. الإختبار كان جداً سهل وكله نظري ممكن يجيبوا  لكم ادوات أو سلايدات وتتعرفوا عليها او صورة فأر مشرح ويأشروا لكم على جزء منه.

  

‘

الكيمياء Chemistry

أكثر قسم متعاون وشرحهم مُمتاز. الميد تيرمز كانت سهله بإتفاق الجميع! مذاكرة المادة من السلايدات تكفي, وإذا ودكم تتدربوا زياده, في الكتاب فيه مجموعة مسائل وبعضها موجود حلها. اهم شي انكم تذاكروا أول بأول عشان ما تتراكم عليكم المحاضرات. خصوصاً قسم الأورقانيك في الترم الثاني, المحاضرات كميتها كبيره وبعض المعلومات فيها تشابه. افضل طريقة لمذاكرة الأورقانيك انكم تقسموا لكم جدول لكل مجموعه تأخذوها وتكتبوا خصائصها + التسمية والأشياء المتعلقه فيها وبكذا بـ تسهل عليكم. الإختبار النهائي كان مستواه اصعب من اختبارات الميد لذلك ركزوا في المذاكره ولا تتهاونوا بالمادة, ركزوا على الـ skeletal structure وكل الصيغ والرسومات اللي بيطلبوا منكم حفظها.

معمل الكيمياء Chemistry Lab

أجمل لاب! هذا الاب فعلياً بتطبقوا فيه بشكل عملي.عادةً اسبوع الدكتوره بتشرح لكم طريقة التجربه, والأسبوع اللي بعده يكون إختبار على نفس التجربة. كان نظام الاب مريح جداً بحيث أن التجارب اللي نختبرها ناخذ درجتها وما عليها فاينل مره ثانيه. 

‘

الفيزياء Physics

المادة في البداية كانت سنوية وبعدها حاولنا مع القسم وتغيرت وصارت فصلية يعني ميد تيرم وفاينل لكل سمستر. لا تغلطوا نفس غلطتي وافهموا الفيزياء من البدايه. الفيزياء سهل بس يحتاج مُذاكره اول بأول وتدريب على المسائل! اذكر درجة اول اختبار كانت مُحبطة جداً والسبب طريقة مذاكرتي كنت اذاكر بس من السلايدات وما احل مسائل الكتاب, بس في الإختبار الثاني بدأت احل المسائل اللي موجوده في الكتاب والتتوريالز, هالشي ساعدني مرررره!

التتوريالز مره مهم يجيبوا افكار مشابهه له واحياناً نفس الأسئلة بالضبط.

مواضيع الترم الأول كانت سهله السرعه والتسارع وقوانين نيوتين والعزم, يعني إذا بدأتوا صح وذاكرتوا له الإختبار بيكون جداً سهل. ركزوا على الوحدات دائماً يجيبوا اسئلة منها, كل قانون اعرفوا وش وحدته ووحدة كل شيء فيه.

يعني مثلاً F=m*a

مو بس تعرفوا ان وحدة القوة = نيوتن N, لازم تعرفوا بعد انها تساوي \s^2 kg*m

ركزوا في السؤال واقرأوه اكثر من مره عشان تعرفوا المطلوب.

معمل الفيزياءLab  Physics

المعمل عبارة عن شرح للتجربة, وبعدها تطبقوا بالأدوات وتسجلوا البيانات. والبيانات اللي تسجلوها تطبقوا عليها عدة قوانين. مذاكرة الإختبار النهائي من الملزمه يعني الأوراق اللي تعبوها والرسومات البيانية اللي ترسموها لازم تحتفظوا فيها لأن المذاكرة منها.

في مذاكرة النهائي ركزوا على الرسومات البيانيه والتحويل بين الوحدات، مثلاً: كيف تحولوا من متر إلى مايكرو او العكس. وركزوا على الإشارات "سالب,موجب" خصوصاُ في العدسات. 

المواد الفصلية :

     لغة إنجليزية أكاديمية وتخصصية  English of Academic and Specific purpose

المقرر عباره عن esp و EaW

ESP  : "لغة إنجليزية تخصصية" المادة عبارة عن مصطلحات طبية تحفظوها مع معانيها. افضل شيء لمذاكرة المادة, تقسيم الكلمات بحيث انكم كل يوم تحفظوا منها جزء. لما تجي وقت مذاكرة الإختبار بيبقى لكم المراجعة بس!

EaW : "لغة إنجليزية اكاديمية" المادة تدربكم على مهارة الكتابة لأنواع مختلفة من الإيسايز Comparative , Argumentative… بالنسبة لي المادة كانت سهله لأن المس اللي تعلمنا Qskills Reading & Writing كانت تهتم بالرايتنق مره, وخلتنا نتدرب على كل انواع الإيسايز في كل الوحدات وتخلينا نسوي لهم  Editing فـ هالشي طور من مهارة الكتابه عندي بشكل كبير.

بشكل عام المادة جداً سهلة وبسهولة تجيبون فيها  .A+

‘

مهارات التعلم والبحث Learning and Research Skills

الكتاب جديد واحنا اول دفعه درسته. الكتاب كبير وفيه مصطلحات صعبه فهالشي كان عائق خصوصاً ان ببداية الدراسه ما كانت لغتنا كويسه مره. كان عندنا كويزات وكلها صح وخطأ وإختياري. وبيطلبوا منكم تسووا برزنتيشن, احنا حددوا لنا مواضيع واخترنا منها. ومن متطلبات المادة انكم تسووا بحث Research فردي وبيعلموكم على طريقته ولازم تستخدموا مصادر موثوقه والأفضل تكون من مكتبة الجامعة الإلكترونية. بتكون فيه زيارة لمكتبة الجامعة وهناك بيعلموكم كيف تستخدموا المكتبة الإلكترونية وكيف تكتبوا المصادر.

بما إنا اول دفعه تدرس المنهج، كان فيه لخبطه شوي في الـ Research, خصوصاُ إنه كان فردي ومستوى اللغة عند الطالبات مختلف ووقته كان قريب من الإختبارات النهائية. عشان كذا تغاضوا عن بعض الأخطاء فيه وما حاسبونا بشكل دقيق.

‘

       مهارات الإتصال Communication Skills

محتواها اسهل من مهارات التعلم وفي نهايتها وحدة تتكلم عن تواصل الدكتور مع المريض، جداً مفيده. ومن متطلبات المادة برزنتيشن وCV + Cover Letter وعمل تطوعي. عملنا كان "زيارة لدار المسنين" :

  الكويزات كانت مقالية ولكنها سهله. في الإختبار النهائي كان فيه جزء مقالي عطونا بيانات وطلبوا منا نكتب Cover Letter.

‘

          مهارات الحاسب الآلي Computer Skills

مادة سهله جداً وتتكلم عن الأساسيات وبرامج الأوفيس. الكلاسات كانت مُمله خصوصاً كلاسات 3-5.

من متطلباتها مشروع بالآكسس. مذاكرتها من الكتاب وفي إختبار الميد والفاينل الكمبيوتر بيكون مفتوح قدامكم يعني تقدروا تتأكدوا من الإجابة بأنكم تطبقوا الخيارات الموجودة. سهل تجيبون فيها A+.

‘

         العقيدة والأخلاق Creed and Ethics

مادة طويلة ومواضيعها نفس مواضيع الدين بثانوي. من متطلباتها مشروع قيمي "عبارة عن تفعيل قيمّ مثل الصلاة، التوحيد، الصدقة، التطوع" وحفظ قرآن من جزء عمّ. الإختبارات فيها جزء مقالي وصح وخطأ واختياري, المذاكره من الكتاب وبيحددوا لكم الأدله المطلوبة.

‘

       النظام الإجتماعي في الإسلام Social System in Islam

اسهل من مقرر العقيدة لأن مواضيعه معروفه تتكلم عن المجتمع والخطبه والزواج والطلاق. ونفس شي عندكم مشروع قيمي وحفظ قرآن. والإختبار نفس طريقة إختبار العقيدة بس بدون أدله. كلاسات الدين مو متعبه واغلب الكلاسات كنا نطلع قبل الوقت.

مشروع قيمي :

مواد الدين سهل ينجاب فيها a+.

‘

         التربية البدنية والصحية Health & Physical Education

احلى شي في المادة الجزء العملي. بالنسبة لكلاسنا بدأنا بالجزء العملي وبعدها الجزء النظري, ووقت الجزء العملي كنا نروح صالة الفهد الرياضيه. صحيح ان الكلاس من 3 الى 5, بس كان الجزء العملي جداً جميل. البعض يشيل هم الجزء العملي وانه لازم يتدرب, بالنسبة لي ما كنت اتدرب للجزء العملي وما كنت اسوي رياضه من قبل ومع ذلك اخذت فيه الدرجة الكامله. من متطلبات المادة برزنتيشن (قروبات) وحملة تتكلموا فيها عن شيء متعلق بالمادة. 

(صور من حملتنا) :

  

المادة ما فيها اختبار ميدتيرم بس فاينل والمذاكرة من الكتاب. الكتاب طويييل وفيه معلومات واجد, وبالنسبة لمذاكرتي كانت قراءة لأن ما كان عندنا غير يوم واحد نذاكر فيه. ركزوا في المذاكرة على الأرقام والنسب وفرقوا بين المصطلحات المتشابهه زي التحمل العضلي والقوة العضلية. 

‘

صحيح هالسنة كانت مليئة بالصعوبات والتحديات. صعوبتها ما كانت بالمواد نفسها ولكن بكميتهم وبالضغط النفسي اللي عشته هالسنه. مرت لحظات كنت استنى السنه تخلص واسحب ملفي لو ما انقبلت برغبتي الأولى ولكن الحمدلله, ربي ما ينسى عباده وما يضيع تعبهم. كل لحظات تعبي وإجتهادي نسيتها لما شفت درجاتي ومعدلي وفرحة أهلي فيهم. حبيت اكتب تجربتي عشان افيدكم زي ما استفدت من مدونات السنوات السابقه. كل شي مكتوب هنا يعبر عن رأيي، ركزوا على الأشياء اللي بتفيدكم. لا تتركوا الكلام السلبي يحطمكم ابداً لأن العامل النفسي جداً مهم في نجاحكم. استفيدوا من تجارب الآخرين لكن لا تتوقعوا إنها مُمكن تنطبق عليكم 100%! مثلاُ, في المواد العلميه عندنا روتيشن يعني الدكاتره مو ثابتين, كل فترة يتغيروا, ف كنت أسمع بعض الآراء عن بعض الدكاترة ولما تعلمني الدكتورة اكتشف ان شرحها عكس اللي إنقال, سواء كان رأيهم سلبي او ايجابي. اللي بقوله لا تتأثروا بالكلام السلبي ابداً يعني مثلاً لما احد يقول هالدكتورة شرحها ابداً مو زين, لا تقتنعوا بهالشي إلا لما تجربوه لأنكم لو اقتنعتوا قبل ما تجربوا, بتحضروا المحاضرة وهالفكرة في بالكم ويمكن ما تركزوا بالشرح. ممكن مو كل شي ينطبق من اللي كتبته ينطبق على دفعتكم, لأن بالنسبة لدفعتنا تغيرت بعض القرارات وتغيرت بعض الكتب (مهارات الإتصال, مهارات التعلم).

· احرصوا على كتابة الملاحظات مع الدكتورة, بتفيدكم في المذاكرة لو نسيتوا الشرح.

· احرصوا على المذاكرة أول بأول واستغلوا اوقاتكم, واستغلوا البريكات الطويلة.

وقت البريكات الطويلة، كنت اشوف لي كلاس فاضي واذاكر فيه، والبعض كان يذاكر في المكتبة.

· ضحوا بوقتكم وبوناستكم عشان مستقبلكم, هي سنة وحده وبعدها بيتحدد مصيركم ومستقبلكم.

ودائماً تذكروا هذي العبارة : "أعطِ التحضيرية سنة من عمرك، تعطيك العمر كله"

وإنتهت السنة التحضيرية بحلاوتها وبمُرها.

  

‘

وكما كُنت على ثقة بربي دائماً, الآن انا طالبة طب كما تمنيت. الحمدلله!

لأي استفسار أو مساعدة :

Ask.Fm: http://ask.fm/zozii7

Curiouscat: https://curiouscat.me/ZainabZaki
Twitter : @ZoziiMadrid